2019ko udaberritik Kirikino aisialdi taldeak baratzea du Laudioko udal ortu komunitarioetan. Bertan, adin guztietara bideratutako tailerrak burutzen dira asteburuetan, jaten dugunaren gaineko kontzientzia hartzea helburu eta naturarekin dugun harremanetan eragiteko asmoarekin.
Parte hartzeko, 688 726 665 zenbakira idatzi bertaratuko zarela abisatuz eta zalantzak izatekotan bertatik argituko dira.
2019an baratzean hasitako ibilbidean, beti izan dugu buruan espazioan leku bat uztea atsedenerako, jolaserako, komunitatea eratzeko...
Hori dela eta, 2020ko neguan haur, gazte eta familiekin prozesu parte hartzaile bat abiatu genuen lekuaren nondik norakoak zehazteko. Ondoren auzolanari ekin genion.
Tipia, liburutegitxoa, atseden tokia, bankuak, sarea, aretokia eta zirkuituak osatzen dute jolasparkea besteak beste.
Abuztuan zehar Kirikinoren baratzean aurki daitezkeen landareen errepasoa, iragan hilaren 9an egindako auzolanaren irudiak eta datorren igandean, abuztuak 23 arratsaldeko 18:00etan izango den auzolanean parte hartzeko deia aurki daitezke ikus entzunezkoan besteak beste.
Abuztuan zehar Kirikinoren baratzean ateratako argazkiekin sortutako iruditegia da honakoa.
Datorren igandean, abuztuak 23 arratsaldeko 18:00etan izango den auzolanean parte hartzeko deia luzatu dute baratzeko lantaldeko kideek.
Iragan udaberritik kirikinotaldea.eus atarian baratzearen inguruko informazio ezberdina argitaratzeari ekin genion. Hori dela eta, hilabetero, baratzearen egoera laburbiltzeko bideoak osatzen ditugu. Hau, 2020ko uztailekoa da.
